Oravankara Bhagavathy Theyyam - ഒറവങ്കര ഭഗവതി തെയ്യം

Oravankara Bhagavathy Theyyam - ഒറവങ്കര ഭഗവതി തെയ്യം

മാതമംഗലം പാണപ്പുഴ പ്രദേശങ്ങളിൽ കെട്ടിയാടുന്ന ഒരു തെയ്യമാണ് ഒറവങ്കര ഭഗവതി

വളരെക്കാലം മുന്‍പ് പാണപ്പുഴയിലെ ഭൂരിപക്ഷം ആൾക്കാരും തീയ്യ സമുദായക്കരായിരുന്നു. ഏതാണ്ട് മുന്നൂറു കൊല്ലങ്ങള്‍ക്ക് മുന്‍പ് (AD 700 കാലഘട്ടങ്ങളിൽ) മന്ത്രമൂർത്തികളുടെ ഉപാസകരും ജ്യോതിഷവും അധ്യാപനവും കുലത്തൊഴിലായായ ഒരു കുടുംബം ഇവിടെ ഉണ്ടായിരുന്നു. ജ്യോതിഷ, മാന്ത്രിക കാര്യങ്ങളില്‍ പ്രശസ്തനായ ഒരു ഗുരുക്കൾ ഈ കുടുംബത്തില്‍ ഉണ്ടായിരുന്നുവെത്രെ. ഔപചാരിക വിദ്യാഭ്യാസം നിലവില്‍ ഇല്ലാതിരുന്ന അക്കാലത്തു അദ്ദേഹം കുട്ടികളെ എഴുത്തും വായനയും കൂടാതെ കളരിയും മന്ത്രവിദ്യകളും പഠിപ്പിക്കുമായിരുന്നു. ഇതിനായി വീടിനരികെ തന്നെ ഒരു കളരി സ്ഥാപിച്ചു അധ്യാപനം നടത്തിവന്നു. തീയ്യ സമുദായത്തിലെ നിരവധി പേര്‍ ഗുരുക്കൾക്ക് ശിഷ്യ ഗണങ്ങളായി. അക്കൂട്ടത്തിൽ വലിയവീട് എന്ന കുടുംബത്തിലെ അടിയാംകുളം തണ്ടാൻ എന്ന ആൾ ശിഷ്യരില്‍ പ്രമുഖനായിരുന്നു.

അക്കാലത്ത് പാണപ്പുഴ, ചിറക്കല്‍ തമ്പുരാന്റെ അധീനതയിലായിരുന്നു. പാണപ്പുഴ കളരിയെ കുറിച്ചു അറിഞ്ഞ ചിറക്കല്‍ തമ്പുരാന്‍ ഗുരുക്കളെ അങ്കത്തിന് വിളിച്ചു. തിരുവായ്കു എതിര്‍ വായില്ലാതിരുന്ന ആ കാലത്ത് വിളിച്ചാല്‍ പോകാതിരിക്കാനും പറ്റില്ല. ഗുരുക്കള്‍ വലിയവീടിലെ തന്റെ പ്രധാന ശിഷ്യനൊത്തു അങ്കത്തിന് പോകാനുറച്ചു. അങ്കത്തിന് തലേ ദിവസം ഗുരുവും ശിഷ്യനും കളരിയിലെ മന്ത്ര മൂർത്തികളെയും വലിയവീടിലെ കുലദൈവങ്ങളെയും തൊഴുതു ചിറക്കല്‍ കോവിലകത്തേക്ക് പുറപെട്ടു. വഴി മദ്ധ്യേ കടന്നപള്ളി വെള്ളാളം ശിവക്ഷേത്രത്തിലും തൊഴുതു, സന്ധ്യായപ്പോള്‍ വളപട്ടണത്ത് എത്തി. നേരം ഇരുട്ടിയപ്പോള്‍ അകലെ വെളിച്ചം കണ്ട ഒരു കുടിലിലേക്ക് അവര്‍ ചെന്നു. ഒരു വൃദ്ധയാണ് അവിടെ താമസിച്ചിരുന്നത്. വിവരങ്ങള്‍ ഒക്കെ പറഞ്ഞപ്പോള്‍ അന്ന് അവിടെ താമസിക്കുവാന്‍ അനുവദിച്ചു. പിറ്റേന്ന് രാവിലെ കോവിലകത്തേക്കു പുറപെടുമ്പോള്‍ തൊട്ടടുത്തുള്ള കളരി വാതുക്കല്‍ ക്ഷേത്രത്തില്‍ ചെന്നു ഭഗവതിയുടെ അനുഗ്രഹം വാങ്ങണമെന്ന് വൃദ്ധ പറഞ്ഞു. അത് അനുസരിച്ച് ഗുരുവും ശിഷ്യനും ക്ഷേത്രത്തിലെത്തി. ഭഗവതിയുടെ തെയ്യം പുറപെട്ട സമയമായിരുന്നു അത്. ഗുരു ശിഷ്യന്മാർ കാര്യങ്ങള്‍ ഭഗവതിയെ ധരിപ്പിച്ചു. അവരില്‍ പ്രസാദിച്ച ഭഗവതി ഒരു നന്ദകവാള്‍ അനുഗ്രഹിച്ചു നല്‍കി. ആ വാളുമായി ഗുരുവും ശിഷ്യനും കോവിലകത്തു എത്തി. തമ്പുരാന്റെ പടയാളികള്‍ അങ്കത്തിനു ഒരുങ്ങി നില്‍കുന്ന കാഴ്ചയാണവര്‍ കണ്ടത്. എന്നാല്‍ ഗുരുക്കളുടെ കയ്യിലെ നന്ദക വാളില്‍ നിന്നും പുറപെട്ട അത്ഭുത രശ്മികള്‍ കൊണ്ട് പടയാളികള്‍ ബോധമറ്റു വീഴാന്‍ തുടങ്ങി. ഈ കാഴ്ച കണ്ടു ഭയന്ന രാജാവ് അവരെ സ്വീകരിച്ചിരുത്തി ആചാര്യ സ്ഥാനം നല്‍കി. ഗുരുവിനു ഒരു ചൂരലും ശിഷ്യന് തണ്ടയാന്‍ എന്ന പദവിയും നല്‍കി ഒരു ഓലകുടയും സമ്മാനിചൂ. രണ്ടുപേരും സസന്തോഷം പാണപ്പുഴ യിലേക്ക് മടങ്ങി.

വൈകിട്ട് തങ്ങളുടെ വീടുകളിലെത്തി രണ്ടുപേരും ആഹാരം കഴിക്കാന്‍ ഇരുന്നു. അപ്പോള്‍ ഗുരുവിന്റെ സമീപത്തിരുന്ന നന്ദകവാള്‍ വിറയ്കുന്നതായി കണ്ടു. ഇതേസമയം ശിഷ്യന്റെ വീട്ടില്‍ ഓലക്കുടയും വിറയ്കുന്നുണ്ടായിരുന്നു. പരസ്പരം വിവരം പറയാന്‍ പുറപ്പെട്ട ഗുരുവും ശിഷ്യനും പാതിവഴികുള്ള വയലില്‍ വച്ച് കണ്ടുമുട്ടി. അവര്‍ വിവരങ്ങള്‍ അന്യോന്യം പറഞ്ഞു. തുടര്‍ന്ന് ജ്യോതിഷി പ്രശ്ന ചിന്ത ചെയ്തപ്പോള്‍ നന്ദക വാളിലും ഓലകുടയിലും കളരി വാതുക്കല്‍ ഭഗവതിയുടെ സാന്നിധ്യം കുടികൊള്ളുന്നതായി തെളിഞ്ഞു. തുടര്‍ന്ന് നന്ദക വാള്‍ ഗുരുക്കള്‍ കളരിയില്‍ പ്രതിഷ്ടിച്ചു പൂജിച്ചു. ഓലകുടയിലെ ദൈവ സാന്നിധ്യം ഒരു പീഠത്തിലേക്ക് ആവാഹിച്ചു വലിയവീടിനു കുറച്ചു വടക്ക് ഭാഗത്ത്‌ ഒരു കാവ് പണിതു അവിടെ പ്രതിഷ്ടിച്ചു. വെള്ളിവാളിൽ കുടികൊണ്ട ദേവി അങ്ങനെ ഒറവങ്കര ഭഗവതി തെയ്യക്കോലമായി. തണ്ടാൻ എന്ന ആചാര പേരുള്ള ശിഷ്യനെ തെയ്യക്കോലമായി കണക്കാക്കി തണ്ടാറാച്ചൻ എന്ന തെയ്യക്കോലമായി കെട്ടിയടിക്കാറുണ്ട്.

വണ്ണാന്‍ സമുദായക്കാരാണ് ഈ തെയ്യം കെട്ടിയാടുന്നത്‌.

ഈ തെയ്യത്തെ / കാവിനെ കുറിച്ച് കൂടുതൽ വിവരങ്ങൾ നിങ്ങൾക്ക് അറിയുമെങ്കിൽ ഞങ്ങക്ക് അയച്ചു തരികയാണെകിൽ ഇവിടെ ചേർക്കുന്നതായിരിക്കും

വിശ്വാസപരമായ ഐതീഹ്യത്തോടപ്പം ഓരോ തെയ്യങ്ങൾക്കും അവയുടെ ആരംഭകാലം മുതൽ പിന്നീട് പല കാവുകളിലും തറവാടുകളിലും എത്തിയതുമായി നിരവധി വിവരണങ്ങൾ ഉണ്ടാകാം, വരും തലമുറക്ക് ഉപയോഗപ്പെടും വിധം ഇവയെ വസ്തുതാപരമായി രേഖപ്പെടുത്തുക എന്നതാണ് ഞങ്ങളുടെ ഉദ്ദേശം.

www.theyyamritual.com

Tags : #oravankarabhagavathy #panapuzha #theyyam